Ambasadorët dhe përfaqësuesit e ambasadave në Shqipëri, pjesë e Koalicionit Botëror të Lirisë së Medias, së bashku me përfaqësues të Kombeve të Bashkuara, OSBE-së dhe Bashkimit Europian, kanë lëshuar një deklaratë të përbashkët në shënimin e Ditës Botërore të Lirisë së Shtypit. Ata theksojnë rëndësinë jetike të një mediaje të pavarur për funksionimin e demokracisë.
Në deklaratën e tyre, ambasadorët dhe përfaqësuesit e lartë theksuan se “Një media e pavarur është thelbësore për një demokraci funksionale.” Ata inkurajuan gazetarët të ruajnë profesionalizmin dhe integritetin, duke shmangur çdo interes personal, politik ose financiar dhe të nxisin përfaqësimin gjithëpërfshirës, duke shmangur diskriminimin dhe paragjykimet.
Deklarata vijon me një thirrje për mbështetjen e gazetarëve, duke theksuar se “sulmet ndaj gazetarëve apo ndaj shtypit të lirë nuk mund të justifikohen kurrë”. Ata iu bënë thirrje politikanëve, autoriteteve të zbatimit të ligjit dhe bizneseve të mbrojnë gazetarët për të kryer lirisht detyrën e tyre.
“Deklarata e plotë: Ambasadorët dhe ambasadat në Shqipëri, anëtarë të Koalicionit Botëror të Lirisë së Medias, si edhe përfaqësuesit e Kombeve të Bashkuara, OSBE-së dhe Bashkimit Europian u takuan për të shënuar Ditën Botërore të Lirisë së Shtypit, për të ripohuar angazhimin tonë për lirinë e shtypit dhe lirinë e shprehjes. Ne përsëritëm mbështetjen tonë për Shqipërinë që të vazhdojë të zhvillojë një mjedis mediatik, ku gazetarët profesionistë dhe etikë mund të hetojnë dhe raportojnë në mënyrë objektive, pa frikë dhe pa u intimiduar. Ne përqafojmë rëndësinë e gazetarisë dhe lirinë e shprehjes në përballen me krizën globale të mjedisit. Ndërsa shënojmë Ditën Botërore të Lirisë së Shtypit, ne duartrokasim trimërinë e gazetarëve në raportimin e së të vërtetës duke u mundësuar qytetarëve të marrin informacion të saktë. Ne u bëjmë thirrje politikanëve, autoriteteve të zbatimit të ligjit, biznesit të sigurojnë që gazetarët ta kryejnë lirisht këtë detyrë jetike.”
