Një operacion i gjerë antidrogë është zhvilluar gjatë natës së sotme në Tiranë, ku janë vënë në pranga dhjetra persona. Burime bëjnë me dije se me urdhër të prokurorisë janë lëshuar 30 urdhërarreste, pjësa më e madhe e të cilave janë ekzekutuar.
Personat e arrestuar dyshohet se shpërndanin lëndë narkotike në afërsi të shkollave dhe lokaleve të natës. Operacioni u zhvillua nga sektori kundër narkotikëve në Policinë e Tiranës.
Nga ky aksion mësohet se janë sekuestruar lëndë narkotike të llojeve të ndryshme, si dhe sasi parash. Në lidhje me këtë operacion do të ketë edhe një konferencë urgjente për mediat nga drejtori i policisë së Tiranës Tonin Vocaj. Në konferencën e orës 09:00 Vocaj pritet që të japë më shumë detaje në lidhje me personat e arrestuar, dhe rolet e secilit prej tyre.
Rrjeti i shpërndarjes së drogës është mbajtur nën vëzhgim dhe përgjim që prej janarit të këtij viti.
Mësohet se pjesë e grupit që është goditur nga Policia e Tiranës, janë dhe disa persona që janë arrestuar më herët, përfshirë edhe efektivin e RENEA-s Ervis Shkurta, i cili është vënë në pranga pak javë më parë.
Po ashtu pjesë e grupit Tiranë, janë edhe Shkëlqim Ostreni, Igli Begaj dhe Eno Sulejmani, të cilët u arrestuan në 22 mars, pasi u kapën me kokainë, dhe tentuan që të përplasnin efektivët e policisë. Atyre iu sekuestrua asokohe një sasi prej 1 kilogramësh kokainë, e cila do të shitej në doza të vogla në kryeqytet.
