Andri Ibrahimaj, burri i ministres Delina Ibrahimaj është përfshirë në një ngjarje të paprecedentë, pasi ka goditur me thikë një zyrtar të lartë duke i kërkuar të japë dorëheqjen. (Lexo këtu)
Policia ka dalë me njoftim zyrtar për rastin. Ngjarja ka ndodhur në nëntor të vitit të kaluar, por nuk u bë publike nga policia, ndërsa edhe pse kanë kaluar mbi pesë muaj nga hetimet, duket se ende nuk ka asnjë urdhër ndalimi të lëshuar ndaj autorit të dyshuar.
Burri i ministres Delina Ibrahimaj, Andri Ibrahimaj dyshohet se qëlloi me thikë për shkak të detyrës drejtorin e përgjithshëm të Agjencisë së Trajtimit të Kredive (ATK), Ari Koshaj.
Kjo është e vërtetuar edhe me aktin e ekspertizës mjeko-ligjore që thotë se Koshaj ka dy prerje me thikë.
Megjithatë, policia thotë se ka vepruar në përputhje me ligjin, duke ia kaluar rastin Prokurorisë së Tiranës dhe duke njoftuar se e ka referuar ngjarjen për veprën penale “goditje për shkak të detyrës”, ndaj Andri Ibrahimajt.
Njoftimi i Policisë së Shtetit:
Në lidhje me një lajm të publikuar në disa media për veprimet e Policisë së Shtetit, pas marrjes së një kallëzimi, sqarojmë se:
Më datë 21.11.2023 i është marrë kallëzimi shtetasit E.K. se, në rrugën “Tefta Tashko Koço” është kanosur dhe goditur për shkak të detyrës nga shtetasi A.I. Shtetasit E.K. i është dhënë vendim mjeko-ligjor.
Në vijim të veprimeve dhe në zbatim të detyrave të lëna nga prokurori i procedimit penal u është marrë deklarim shtetasve A.I., E.M. e O.M. dhe materialet janë referuar në prokurori më datë 04.12.2023 për veprën penale “Goditje për shkak të detyrës”, në ngarkim të shtetasit A.I.
Policia e Shtetit mbetet maksimalisht e angazhuar në përmbushjen e misionit të saj për ruajtjen e rendit e të sigurisë publike, garantimin e zbatimit të ligjit, në përputhje me Kushtetutën dhe aktet ndërkombëtare, duke respektuar të drejtat dhe liritë e njeriut.
