Sipas zëdhënëses së Këshillit të Sigurisë Kombëtare, Adrienne Watson, Irani ka nisur një sulm kundër Izraelit që “ka gjasa të shpaloset brenda disa orësh”.
“Presidenti Biden po përditësohet rregullisht mbi situatën nga ekipi i tij i sigurisë kombëtare dhe do të takohet me ta këtë pasdite në Shtëpinë e Bardhë, dhe ekipi “është në komunikim të vazhdueshëm me zyrtarët izraelitë, si dhe partnerë dhe aleatë të tjerë”, thuhet në deklaratë sipas CNN.
Watson ripohoi qëndrimin e presidentit se “mbështetja jonë për sigurinë e Izraelit është e hekurt” dhe se Shtetet e Bashkuara “do të qëndrojnë me popullin e Izraelit dhe do të mbështesin mbrojtjen e tyre kundër këtyre kërcënimeve nga Irani”.
Jordania ka shpallur gjendjen e jashtëzakonshme pasi Irani lëshoi dhjetëra dronë dhe raketa në Izrael. Mediat izraelite kanë raportuar se dronët mund të fillojnë të mbërrijnë rreth orës 2 të mëngjesit me orën lokale (12 të mëngjesit me kohën e Mbretërisë së Bashkuar), por raketat mund të mbërrijnë më shpejt.
Izraeli ka qenë në gatishmëri të lartë për një sulm iranian që kur një sulm ajror vdekjeprurës në ambasadën e Iranit në Siri vrau dy nga gjeneralët e tij kryesorë. Izraeli është fajësuar gjerësisht për sulmin, por ai nuk e ka komentuar publikisht sulmin.
