Një tjetër socialist në telashe. Bëhet fjalë për deputetin e Partisë Socialiste, Eduart Ndreca, vëllai i të cilit është vënë në hetim zyrtar. Vetë deputeti ka komentuar aksionin e policisë në Kashnjet ku u gjet një stan i përshtatur për kultivim kanabisi gjë që solli dhe ndalimin e të vëllait, Armando Ndreca.
I pyetur nga BIRN, deputeti i Ndreca u shpreh se nuk kishte ende një njoftim zyrtar. Por, ai shtoi se i vëllai duhej të hetohej si çdo qytetar tjetër dhe se duhet të përgjigjet para ligjit nëse e ka shkelur atë.
“Nuk ka ende njoftim zyrtar nga prokuroria, por dua të them që prokuroria dhe policia duhet të bëjnë punën e tyre pavarësisht kush është personi, vëllai im si gjithë qytetarët është i barabartë para ligjit,”- tha ai në telefon.
Kujtojmë se një ditë më parë, Armando Ndreca, vëllai i deputetit të PS, Eduard Ndreca u ndalua nga Policia e Lezhës, ndërsa kunati i tij, Armel Nikdukaj dhe shoku i të dyve Elvis Shpellzai u vunë në pranga pas një aksioni në pyllin e fshatit Kashnjet që zbuloi një stan të përshtatur për kultivim kanabisi. Në dëshminë e dhënë në polici, Ndreca është shprehur se nuk ka lidhje me drogën, ndërkohë zyrtarisht nga Policia e Shtetit nuk është bërë ende me dije roli i tij.
