Zbardhen detaje të reja nga vrasja e të riut Aurelio Dervishi, ngjarje e ndodhur mbrëmjen e së dielës në Shkozë të Tiranës.
Katër të arrestuarit, 3 prej të cilëve të mitur, do të dalin nesër para Gjykatës së Tiranës, ku do të njihen dhe me masën e sigurisë. Ata do të akuzohen për vrasje me dashje e kryer në bashkëpunim, ndërsa tashmë është zbardhur dhe dinamika e plotë e ngjarjes së rëndë.
Të rinjtë e përfshirë në ngjarjen e rëndë janë “zbërthyer” sot para hetuesve duke treguar gjithçka, konfliktin dhe si nisi përplasja mes dy grupeve që udhëtonin me makina të ndryshme.
Një prej të miturve të arrestuar, 15-vjeç, ka pranuar autorësinë e krimit, duke thënë se ka qenë pikërisht ai që ka qëlluar me thikë Dervishin. Ndërkohë dy 16-vjeçarët kanë pranuar se kanë dhunuar grupin tjetër por jo të kenë përdorur thikë, të njëjtin qëndrim ka mbajtur edhe 20-vjecari i arrestuar Frensis Shehu. Në makinë së bashku me viktimën në momentin e sherrit kanë qenë dy djem dhe dy vajza të tjera.
Gjatë marrjes në pyetje ata kanë deklaruar se janë ndeshur me automjetin e autorëve pasi po bënin xhiro nëpër lagje për shkak se banesat e tyre nuk janë shumë larg.
Vajza e mitur 16-vjecare, e cila ndodhet në gjendje të rënduar psikologjike, rezulton se ishte e lidhur me Frensis Shehun, mikun e autorit të vrasjes. Ajo ka deklaruar se në makinë me viktimën ishte për shkak të miqësisë që kishin dhe se e kishte në afërsi të lagjes.
