Një 27-vjeçar shqiptar është arrestuar ditën e sotme nga policia e Tiranës. Ai së bashku me një 42-vjeçar, i cili është shpallur në kërkim, kishin mashtruar një shtetas italian dhe i kishin vjedhur makinën tip “Alfa Romeo”.
Pas denoncimit të shtetasit italian, identiteti i të cilit nuk bëhet i ditur policia është vënë në kërkim të automjetit të vjedhur. 27-vjeçari rezulton edhe i dënuar më parë për tentativë vrasjeje.
Ai u pikas në rrugën “Bilal Golemi” teksa lëvizte me automjetin e shtetasit italian.
I riu tentoi të largohej dhe hodhi armën nga automjeti por më pas arriti të arrestohej. Policia ka sekuestruar makinën tip “Alfa Romeo” dhe armën e zjarrit tip “TT”.
Pas shoqërimit të 27-vjeçarit është zbardhur skema e mashtrimit dhe është shpallur në kërkim 42-vjeçari me inicialet E.P.
Të dy shtetasit akuzohen për “Mashtrim në bashkëpunim” dhe “Prodhimi dhe mbajtja pa leje e armëve luftarake dhe e municionit”.
Njoftim i policisë Tiranë
Qarkullonte me armë zjarri pa leje dhe me makinë të vjedhur, arrestohet në flagrancë nga shërbimet e Komisariatit të Policisë Nr. 2.
Vihet në pranga 27 vjeçari, i dënuar më parë për veprën penale “Vrasja” mbetur në tentativë.
Shpallet në kërkim edhe 42 vjeçari që mashtroi shtetasin italian duke i marrë makinën.
Shërbimet e Komisariatit të Policisë Nr. 2, pas marrjes së kallëzimit nga një shtetas italian, se nëpërmjet mashtrimit shtetasi E. P, i kishte marrë automjetin Alfa Romeo dhe nuk ia kishte kthyer më, organizuan punën për gjetjen e automjetit.
Si rezultat i punës dhe informacioneve të grumbulluara, në rrugën “Bilal Golemi” shërbimet e Policisë kanë konstatuar automjetin, ku dhe kanë ndërhyrë menjëherë për të bërë bllokimin.
Drejtuesi i automjetit ka tentuar të largohet, por nuk ka mundur dot dhe menjëherë ka hedhur nga automjeti një armë zjarri Pistoletë “TT”.
Policia ka bërë arrestimin në flagrancë për veprën penale “Prodhimi dhe mbajtja pa leje e armëve luftarake dhe e municionit”, të shtetasit E.S, 27 vjeç, banues në Tiranë, i dënuar më parë për “Vrasja” mbetur në tentativë.
Gjithashtu është bërë shpallja në kërkim për veprën penale “Mashtrimi” e shtetasit E. P 40 vjeç, banues në Tiranë, i dënuar më parë për të njënjtën vepër penale, pasi ky shtetas ka mashtruar shtetasin italian duke i marrë makinën dhe ja ka shitur shtetasit E.S.
Në cilësinë e provës materiale është sekuestruar arma e zjarrit së bashku me një karikator me fishekë si dhe automjeti në pronësi të shtetasit italian.
Materialet i kaluan Prokurorise së Rrethit Gjyqësor Tiranë, për veprime të mëtejshme.
