Gjykata e Lartë vendosi të pranojë kërkesën e familjarëve të Aleks Nikës, i cili u vra më 21 janar. Ato kishin kërkuar që SPAK të regjistrojë procedimin penal për këtë çështje dhe të nisë hetimet, të cilat deri më tani janë zhvilluar nga Prokuroria pranë Juridiksionit të Përgjithshëm Tiranë. Avokati Genc Gjokutaj ka deklaruar se familja ka të gjithë të drejtën e saj ta kërkojë, por sipas tij ‘kjo e drejtë qëndron në këto parametra deri sa nuk instrumentalizohet nga Edi Rama’.
“Familja Nika ka gjithë të drejtën të kërkojë të drejtën e saj, por kjo e drejtë qëndron në këto parametra deri sa nuk instrumentalizohet nga Edi Rama dhe politika. Ministri aktual i Drejtësisë ka bërë një kallëzim në SPAK dhe është vendosur një mos kompetencë për personat Sali Berisha dhe Lulzim Basha. Vendimi i Strasburgut nuk është detyrues për SPAK-un. Gjithë çështja është e parashtruar sepse e tillë është dispozita. Këta ndryshojnë vetëm godinat, mendësia është e njëjtë”, tha ai.
