Deputeti i opozitës, Enkelejd Alibeaj, ka komentuar takimin e zhvilluar mes kryetarëve të grupeve parlamentare dhe kryetares së Kuvendit, Lindita Nikolla, në përpjekje për të zgjidhur tensionet dhe rikthyer normalitetin në Parlament. Alibeaj ka bërë të ditur se ka një marrëveshje për sabotimin e Komisionit të Reformës Zgjedhore, duke përfshirë opozitën në diskutime. Ai ka theksuar se ky veprim është një shenjë e një pazari që po bëhet në dëm të interesave të shqiptarëve, duke akuzuar liderët aktual dhe të mëparshëm, Edi Ramën dhe Sali Berishën, për ndikime të dyshimta.
Alibeaj po ashtu ka shtuar se në emër të Partisë Demokratike (PD), asnjë person i emëruar ose i dëshiruar nga Edi Rama nuk ka të drejtë të përfaqësojë ose flasë në emër të tyre. Në përfundim, ai ka bërë thirrje për sqarime publike nga Partia Socialiste (PS) në lidhje me mundësinë e një pazari për Reformën Zgjedhore dhe ka theksuar nevojën për transparencë dhe respekt të drejtave të opozitës në këtë proces.
Reagimi i Enkelejd Alibeajt:
Dy sqarime që publiku ka nevojë t’i dijë lidhur me negociata sekrete apo marrëveshje okulte të përfolura në media:
1. PS duhet të sqarojë nëse ka vendosur të bëjë pazar për Reformën Zgjedhore. Në media referuar burimeve nga PS dhe grupi i Sali Berishës, është bërë e ditur se ka një dakordësi për të dështuar Komisionin e Reformës Zgjedhore në mënyrë që çështja të kalojë në Komisionin e Ligjeve ku socialistët kanë vendimarrjen me shumicë votash e sidomos ku opozitës i mohohet e drejta e Vetos, si garanci që PS të mos bëjë ligj zgjedhor të njëanëshëm duke peshkuar vota opozitare. Dihet se ata janë kundër votës së diasporës, votimit elektronik, listave të hapura, një zone elektorale. Nëse kjo është e vërtetë ky është një pazar në kurriz të shqiptarëve dhe për interesa të dy individëve që duan të mbajnë peng Shqipërinë, Rama dhe Berisha.
2. Në emër të PD nuk mund të flasë asnjë i emëruar apo i dëshiruar i Edi Ramës.
