Ditën e djeshme në komunat veriore të Kosovës me shumicë serbe janë shpërndarë disa fletushka të një organizate të re të quajtur “Mbrojtja Popullore”.
Në fletushkat e vendosura gjithandej në fasadat e pallatave dhe shtëpive private ishin dhënë udhëzime për t’iu kundërvyer policisë së Kosovës dhe administratës komunale.
Lajmin e ka konfirmuar kryesuesi i Kuvendit Komunal të Mitrovicës së Veriut, Nexhat Uglanin në “Interaktiv” të KTV-së.
“Informata nga terreni është që sonte ka dalë një organizatë e re ‘Mbrojtja Popullore’ të cilët kanë shpërndarë fletushka që të përgjigjen kundër policisë dhe kundër administratës komunale përmes koktejeve molotov, gurëve dhe gjërave të tjera”, ka thënë ai.
Bëhet me dije se fletushka udhëzonte serbët që të dilnin kundra policisë së Kosovës duke i gjuajtur me sende të rënda dhe me molotov.
Ndërsa në fletushkë shkruhej: “Kur policia arreston dhe ngacmon serbët siguroheni t’i mbroni ata kundër terrorit. Rezistenca nis tash. Do të vazhdojë ‘Mbrojtja Popullore’”.
