Drejtoria e Përgjithshme e Shërbimeve të Transportit Rrugor (DPSHTRR) ka rritur sërish çmimet për të marrë një lejë drejtimi.
DPSHTRR, me anë të një njoftimi zyrtar, mësohet se nga 3, 500 lekë të reja çmimi shkon në 4,500 lekë të reja, me një afat prej 15 vitesh.
Mësohet se ky ndryshim hyn në fuqi më datë 5 Shkurt të 2024-ës.
Njoftimi i plotë:
Drejtoria e Përgjithshme e Shërbimeve të Transportit Rrugor, prej disa vitesh tashmë, ka ndërmarrë një sërë nismash për lehtësimin e shumë praktikave dhe burokracive që lidhen me shërbimet që ajo ofron. Nga ana e DPSHTRR-së është bërë rishikimi dhe indeksimi i të gjithë tarifave dhe shërbimeve. Nga një analizë e hollësishme rezulton se shtrirja e këtyre shërbimeve në afate kohore, duke eleminuar detyrimin e paraqitjes në sportel, lehtësimin e kalimit nga një kategori në një tjetër, si dhe uljen e shpenzimeve indirekte (përllogaritur këtu në 7,569,450 kilometra vajtje/ardhje, 529,862 litra karburant, 12,616 ditë pune/vit kohë e shpenzuar), nuk mund të konsiderohet si rritje tarifash, por përkundrazi rezulton një kursim mesatar prej 4,170 lekë për qytetar në vit.
Shembujt e ilustruar më poshtë, tregojnë qartë sa më sipër:
- Tarifa e pajisjes me leje drejtimi me afat vlefshmërie 10 vite, nga 3,500 lekë bëhet 4,500 lekë, por afati tashmë zgjatet në 15 vite. Tarifa e re prej 4,500 lekë, e shpërndarë në vite, nga 350 lekë/viti bëhet 300 lekë/viti!
- Tarifa e pajisjes me leje drejtimi për grupmoshën mbi 65 vjeç, me afat vlefshmërie 5 vite, nga 3,500 lekë, tashmë bëhet 2,000 lekë, me afat vlefshmërie 15 vite!
- Tarifa e pajisjes me Leje Drejtimi Ndërkombëtare me afat vlefshmërie 1 vit nga 500 lekë që ishte, kalon në 1,000 lekë, me një afat vlefshmërie 3-vjeçare. Tarifa e re prej 1,000 lekë, e shpërndarë në vite, nga 500 lekë/vit bëhet 333 lekë/vit!
- Kalimi nga Leje Drejtimi e Kategorisë B në D/D1, pa qenë i detyrueshëm kalimi në kategorinë C, nga 2,200 lekë, bëhet 0, pasi është eleminuar testimi për kategorinë C!
Nga ndryshimi i këtyre tarifave përfitojnë 189,179 qytetarë, duke ju kursyer mesatarisht 788,792,150 lekë/vit. (7,7 milionë Euro).
Ky vendim, për ndryshimin e tarifave për shërbimin e lejeve të drejtimit, hyn në fuqi më datë 5 Shkurt 2024 dhe do të pasqyrohen në faqen zyrtare.
Po deri ku do shkojë zhvatja ndaj qytetarëve? Çfarë nënkupton kjo tarfië e shtuar?
Kjo lëvizje e radhës nga Drejtoria e Patentave është më shumë në kurriz të qytetarëve dhe ndihmë për të gjitha autoshkollat, të cilat do të përfitojnë akoma dhe më shumë para.
Mirëpo, tarifa rritet e nga ana tjetër nuk ka një mbikqyrje nga ana e DPSHTRR se kush mund të pajiset me patentë dhe kush jo, a bëhet vërtet praktika apo mjafton një grusht me para dhe patenta u mor.
Duket se këto rregulla ju shijojnë të dyja palëve edhe Drejtorisë edhe autoshkollave, ndrësa qytetarët u duhet të nxjerrin akoma dhe më shumë para nga xhepi.
