Pse po shqyrtohet me dyer të mbyllura kërkesën e opozitës për ndalimin e marrëveshjes Rama-Meloni?
Që në mëngjes, në Gjykatën Kushtetuese po zhvillohet seanca e shqyrtimit të marrëveshjes mes Italisë dhe Shqipërisë për emigrantët.
Kjo kërkesë është bërë nga 30 deputetë të opozitës, pjesë e grupit të Gazment Bardhit dhe Sali Berishës, të cilët kërkuan që kjo marrëveshje të shpallet e pavlefshme, pasi është tërësisht antikushtetuese.
Por, kjo nuk ishte kërkesa e vetme e deputetëve të opozitës lidhur me këtë çështje.
Ata kanë kërkuar që seanca e ditës së sotme në Gjykatë të ishte e hapur për publikun, por ajo po bëhet me dyer të mbyllura për mediat. Madje mësohet se asnjë nga palët nuk janë të pranishëm në këtë seancë.
Grupi opozitar është shprehur se Kushtetuesja nuk ka preferuar të japë asnjë argument se pse kjo seancë do mbahet me dyer të mbyllura. Ata nënkuptuan se ka mungesë transparence në gjithë këtë proces.
