Ish-anëtari i UÇK-së Hasan Dakaj është arrestuar të premten (5 janar) nga policia serbe teksa po udhëtonte me vëllanë e tij drejt Italisë. Ai është ndaluar në pjesën tjetër të kalimit kufitar Merdare. Lajmin e ka bërë të ditur avokati Xhevdet Smakiqi përmes një postimi në Facebook. Sipas Smakiqit, Prokuroria e Serbisë pretendon se ai në vitin 1999 ka kryer krime lufte.
“Sot jam autorizuar nga familja Dakaj nga Prizreni që të mbrojë të drejtat ligjore të familjarit të tyre Hasan Dakaj, i lindur më 10.08.1980 nga Prizreni, i cili veç se ka qenë veç se ka qenë pjesëtar i UÇK-së është arrestuar në Merdare rreth orës 09:00 të mëngjesit derisa po udhëtonte me vëllain e tij drejt Italisë”, shkruan Smakiqi.
Avokati bën apel që Ministria e Punëve të Jashtme dhe Diasporës e Kosovës që të interesohet për fatin e Hasanit, pasi sipas tij ky i fundit është dërguar në qendrën e ndalimit në Kurshumli, ku mund t’i nënshtrohet torturave.
“Si avokat i familjes Dakaj, i bëj thirrje urgjente MPJD-së që përmes kanaleve diplomatike të kërkojë lirimin e Hasan Dakajt dhe t’i lejohet lëvizja e lirë sikurse çdo shtetasi të Kosovës pa diskriminim. Stop persekutimit të shtetasve të Kosovës nga shteti i Serbisë, e cila po shkel lirinë fundamentale të lëvizjes së lirë me fokus ish-pjesëtarëve të UÇK-së”, përfundon avokati Smakiqi.
Smakiqi ka bërë të ditur se të martën do të mbahet seanca dëgjimore lidhur me kërkesën për caktimin e masës së paraburgimit.
