Armand Duka, kreu i FSHF-së, ka qenë i ftuar në një nga mediat italiane ku ka folur lidhur me shortin e hedhur për EURO 2024, ku Shqipëria do të përballet me Spanjën, Kroacinë dhe Italinë në Kampionatin Europian që do të mbahet në Gjermani.
Duka u shpreh se në të vërtetë nuk donin që të përballeshin me Italinë, pasi përveç raporteve politike, Shqipëria ka raporte shumë të mira edhe në futboll me Italinë.
Në intervistën e tij për mediat italiane, Duka u pyet edhe në lidhje me tifozët, me politikanët që do të dëshironin të ishin në stadium. Ai nuk hezitoi t’i bënte ftesë të hapur Melonit që të ishte prezente në ndeshjes mes Shqipërisë dhe Italisë.
“Problemi ynë tani është që të gjithë shqiptarët duan të jenë në stadium. Nga momenti që kanë parë shortin, të gjithë duan të jenë në Dortmund për të ndjekur ndeshjen Itali-Shqipëri. Shpresojmë që me tifozerinë të krijojmë një atmosferë pozitive, si ajo e miqësores në Xhenova. Kryeministri shqiptar e sigurt që do të vijë. Nuk mendoj se do të mungojë ndonjë politikan në ndeshjen kundër Italisë, të gjithë do të vijnë. Kryeministri Rama është tifoz futbolli, tifoz i Kombëtares dhe sigurisht do të jetë në stadium në këtë ndeshje. Meloni nuk e di, shpresoj të vijë”, tha Duka.
Pavarësisht emrit të madh që përfaqëson Italia, Duka u shpreh se Shqipëria nuk zbret e dorëzuar në fushë më 15 qershor, në sfidën e tyre të parë në “Euro2024”.
