Në Komisionin e Ekonomisë sot u diskutua edhe për propozimin që dha pak javë më parë deputeti socialist, Erion Bracce, i cili kërkonte që shteti të paguante ditët e punës për gratë dhe vajzat gjatë ciklit menstrual.
Ky propozim i tij u hodh poshtë nga Komisioni i Ekonomisë dhe la për një moment të dytë vendimin nëse duhet hequr TVSH-ja nga produktet higjenike që përdorin gjatë ciklit.
Deputeti i PS-së në fjalën e tij tha se këtë nismë e zbatojnë 22 vende të BE-së dhe se nuk mund të avancojnë më tej, nëse nuk miratojnë fillimisht këto propozime.
Gjatë mbledhjes ka pasur dhe diskutime pro dhe kundër lidhur me këtë çështje, por në fund të diskutimit shumica ka rrëzuar nismën.
Për Braccen kjo është një politikë e mirë që duhet ndjekur sa më parë nga qeveria, pasi sipas tij ky propozim mund të ndihmojë që shumë gra dhe vajza të kenë një mbështetje finanaciare nga shteti.
“Ne nuk kemi ndonjë politikë të veçantë për të mbështetur gratë, përveç ndihmës që japim për gratë kryefamiljare. Mbi gratë rëndon puna e papaguar, puna e nën paguar dhe në pa barazi me punën që bën një burrë. Po humbim popullsi, jo vetëm në numër, edhe si pasojë e plakjes, po humbim lindje të reja që lidhen me shëndetin riprodhues të grave. Në këtë pikë kjo masë vlen shumë. Ndikimi qoftë moral por edhe financiar është i konsiderueshëm edhe nëpër familje”, u shpreh ai në komision.
