Shumë kritika janë bërë si brenda ashtu edhe jashtë vendit tonë në lidhje me marrëveshjen Rama-Meloni për strehimin e refugjatëve nga Italia në Shqipëri.
Këtë marrëveshje e ka kritikuar së fundmi gazetari dhe autori i njohur italian, Roberto Saviano, i cili shprehet se ky është një pakt propagandistik dhe se është i parealizueshëm nga pikëpamja juridike. Sipas tij edhe nëse ky pakt zbatohet, do të menaxhohet nga familjet mafioze shqiptare.
Ai tha se është i lartë shansi se krimi i organizuar të bëhet pjesë në menaxhimin e kësaj situate dhe se shteti italian nuk do mund të ketë kontroll se kujt po i shkojnë këto fonde.
Saviano shtoi gjithashtu se ata që do paguajnë mbi kurrizin e tyre të gjitha efektet negative të kësaj marrëveshjeje do të jenë qytetarët dhe emigrantët.
“Dhe në fund, çfarë do të ndodhë në Shqipëri kur të nisë ky projekt? Kush mendoni se do ta menaxhojë ardhjen, prokurimin, mensat, në disa raste edhe arratisjet nga këto qendra? Familjet mafioze shqiptare.
Rreziku që krimi i organizuar shqiptar të marrë pjesë në këtë operacion është shumë i lartë. Pa kontroll të drejtpërdrejtë, siç dihet, kujt do t’i shkojë financimi italian?
E pamë me Turqinë, me Tunizinë, me Libinë. Transferimi i kontrollit të kufijve nuk çon aspak në siguri më të madhe, nuk çon aspak në një kapacitet më të madh menaxhues, ai sjell vetëm tmerrin e padrejtësisë, torturës, korrupsionit.
Ne po lëvizim fizikisht kufijtë tanë në një vend tjetër: nga ana operacionale e gjitha kjo nuk do të përkthehet në një efektivitet më të madh në mbrojtjen e këtyre kufijve, por do të thotë shitje e tyre. Duke larë duart prej tij, duke u përpjekur të detyroni të tjerët të bëjnë punët e pista.
Nga njëra anë, emigrantët do të paguajnë për të gjitha këto. Nga ana tjetër, qytetarët, të cilët mashtrohen dhe grabiten. Burimet ekonomike do t’u hiqen për t’u investuar në qendrat e paraburgimit në Shqipëri. Të cilat megjithatë nuk do të shërbejnë për asgjë,” shkruan Saviano në FanPage.
