GJKKO ka rrëzuar kërkesën e avokatëve të Sali Berishës për përjashtimin e gjyqtares Irena Gjoka nga procesi për ish-kryeministrin. Avokati i Berishës Genc Gjokutaj ka bërë me dije se është rrëzuar edhe pretendimi për rrëzimin e masës, për tejkalim të afateve.
“Ne kërkuam përjashtimin e gjyqtares, e dyta kërkesë. Një reagim krejt i ftohtë dhe një vendimmarrje si të gjitha të tjerat. Sigurisht kjo seancë ia vlejti për të dokumentuar shkeljen e radhës së gjykatës. Vendimi i zbardhur na u dha sot. Imagjinoni që vendimet janë të pa ekzekutuara, vendimet janë të pa depozituara në sekretarinë e gjykatës. Ndërkohë që Gjykata dhe Prokuroria flisnin sikur ato vendime janë komunikuar. Ne e konsiderojmë të pa ekzekutuar atë vendim, pavarësisht se këta i qëndrojnë shkeljes. Një gjykatë dhe një prokurori që shkel Kushtetutën, Kodin e Procedurës Penale e ka në dorë të dytë. Të dyja kërkesat janë rrëzuar”, tha avokati i Berishës Genc Gjokutaj.
