Kryetari i Partisë Demokratike, Lulzim Basha, i ka kërkuar llogari kryeministrit të vendit, Edi Rama për marrëveshjen me Melonin për strehimin e emigrantëve.
Basha ka kërkuar publikisht që Rama dhe qeveria të bëjnë trasnparente për të gjithë qytetarët marrëveshjen e firmosur. Ai tha se kryeministri është ai që përzë shqiptarët dhe sjell emigrantë të paligjshëm në vendin tonë dhe kjo është e patolerueshme sipas Bashës.
“Problemi është që shqiptarët po i përzë dhe po sjell emigrant të paligjshëm nga Afrika, kjo është e papranueshme. Detyra e parë është të vij të bëjë transparencën se kush i ka dhënë mandat të negociojë, me cilindo vend. Italia është një vend mik, aleat, partner, padiskutim, por këto janë interesa kombëtare, s’mundesh nga njëra anë të përzësh shqiptarët, nga ana tjetër të hapësh kufirin për emigrant të paligjshëm. Mbi çfarë bazë? Me çfarë kushtesh? Parimi i parë i qeverisjes është transparenca. Përmes transparencës mund të garantojmë që marrëveshje të tilla nuk bien ndesh me interesin e shqiptarëve, nuk shkelin, nuk shkelmojnë mbi interesin publik për intereat personale të një politikani në hall, kushdo qoftë ky edhe kryeministri. Këto janë kufijtë, kjo është korniza e një qeverisjeje të përgjegjshme. Dhe vendi ka nevojë urgjentepër një qeverisje të përgjegjshme”, u shpreh Basha.
Ndër të tjera kreu i PD-së thekson se Rama do të përballet me interpelancë në Kuvend, pasi sipas tij kjo çështje e rëndësishme duhet të shtrohej në një debat publik të gjërë.
