PS ka mbledhur sot Asamblenë e Zgjeruar në Fier. Kryeministri Rama në fjlaën e tij është ndalur te disa pika si turizmi, rritja e çmimit të energjisë dhe taksat për bizneset. Duke folur për turizmin Rama theksoi se janë rritur me 80% turistët në krahasim me vitin e kaluar.
“Sot mora të dhënat e tetorit për turizmin. Jemi në tetor dhe krahasimisht me tetorin e vitit të shkuar, numri i turistëve që kanë hyrë në Shqipëri është rritur me mbi 80%.
Nga janari në tetor ne kemi prekur numrin e 9 milionë turistëve në Shqipëri. Për të qene të saktë, është 8.92, por gjithsesi është një shifër që do të ishte e paimagjinueshme deri disa vite më parë.
Mos të harrojmë asnjëherë se kur flasim për turizëm, ka disa që mendojnë se kjo është diçka që nuk ka lidhje me jetën e tyre të përditshme.
Në fakt ajo që po ndodh sot është që turizmi po kthehet në industri dhe nga ana tjetër është eksporti më i madh sepse nuk është se ata turistë që vijnë rrinë në ajër, por rrisin konsumin, kërkesën për shërbime dhe prodhime. Patjetër rrisin dhe të ardhurat në ekonomi”, u shpreh Rama.
Sa i përket taksave kre i qeverisë tha se asnjë taksë nuk do rritet, ndërsa shtoi se Shqipëria është i vetmi vend në Rajon që ka biznesin e vogël me 0 taksë.
“Ekonomia është më mirë, por duhet të bëhet më mirë. Vijmë tani te buxheti, vitin e ardhëm ne do ta çojmë pagën mesatare 900 euro. Mos harrojmë që sot një ndër faktet më kokëforta për progresin që po flas, është kokëfortësia e lekut”, tha Rama më tej.
