Forcat tokësore izraelite kanë sulmuar militantët e Hamasit dhe infrastrukturën më 31 tetor në veri të Gazës, përderisa sulmet ajrore po vazhdojnë në mbarë territorin e rrethuar. Sipas ushtrisë, afër 800.000 banorë janë larguar nga veriu i Gazës që kur nisi lufta tre javë më parë.
I nxitur nga shpëtimi i parë i një pengu që mbahej nga Hamasi, kryeministri izraelit, Benjamin Netanyahu, sërish ka hedhur poshtë thirrje për armëpushim dhe është zotuar se do të shtypë aftësinë e grupit militant për të qeverisur me Gazën dhe për të kërcënuar Izraelin, pasi Hamasi nisi sulme të përgjakshme ndaj Izraelit më 7 tetor, që nxitën luftën.
Ushtria tha se vlerëson se 240 pengje janë marrë nga militantët palestinezë gjatë sulmeve të tyre. Një prej pengjeve është liruar gjatë një operacioni të forcave speciale, përderisa Netanyahu tha se lufta tokësore do të ndihmojë në shpëtimin e pengjeve të tjera. Ushtria tha se ushtarja e liruar, Ori Megidish, 19 vjeç, “është mirë” dhe është bashkuar me familjen e saj.
Hamasi ka liruar katër pengje dhe ka thënë se do të lirojë të tjerët në këmbim të mijëra të burgosurve palestinezë që mbahen nga Izraeli. Por, Izraeli ka refuzuar këtë ofertë.
Mbi gjysma e popullsisë prej 2.3 milionë palestinezësh e Rripit të Gazës janë larguar nga shtëpitë e tyre dhe qindra mijëra janë strehuar në shkollat e udhëhequra nga Kombet e Bashkuara apo në spitale, ku janë edhe mijëra të plagosur. Sulmet izraelite kanë goditur afër disa spitaleve në veri gjatë ditëve të fundit, duke alarmuar punëtorët shëndetësorë.
Agjencia e OKB-së për refugjatët palestinezë, e njohur si UNRWA, tha se pothuajse 672.000 palestinezë janë duke u strehuar në shkollat e saj dhe ndërtesa të tjera. Mijëra persona po ashtu gjatë fundjavës hynë me forcë në depo dhe morën ushqime dhe produkte bazike.
Për javë të tëra Gaza po përballet pa energji elektrike dhe Izraeli ka ndaluar furnizimet me karburante që janë të nevojshme për gjeneratorët në spitale dhe shtëpi.
Kreu i UNRWA, Philippe Lazzarini, akuzoi Izraelin për “ndëshkim kolektiv” të palestinezëve dhe se po i detyron që të zhvendosen nga veriu për në jug të Gazës, ku ata po ashtu nuk janë të sigurt.
Lufta po ashtu ka kërcënuar se do të hapë fronte të tjera. Izraeli dhe grupi militant Hezbollah në Liban kanë shkëmbyer zjarr në baza ditore përgjatë kufirit mes dy shteteve, ndërkaq Izraeli dhe Shtetet e Bashkuara kanë sulmuar caqe në Siri të lidhura me Iranin, shtet që mbështet Hamasin, Hezbollahun dhe grupe të tjera të armatosura në rajon.
Në Bregun e pushtuar Perëndimor, ku dhuna mes izraelitëve dhe palestinezëve është rritur, ushtria izraelite tha se ka shkatërruar shtëpinë e Saleh al-Arouri, një zyrtari të lartë të Hamasit që ka ikur në mërgim një dekadë më parë.
Jonathan Conricus, zëdhënës i ushtrisë së Izraelit, tha se operacionet tokësore në Gazë janë përqendruar në veri, përfshirë në qytetin e Gazës, që sipas tij është “qendra e gravitetit të Hamasit”.
“Por, ne po ashtu po vazhdojmë sulmet ajrore në pjesë të tjera të Gazës. Ne po ndjekim komandantët e tyre, ne po sulmojmë infrastrukturën e tyre dhe çdo cak tjetër të rëndësishëm që është i lidhur me Hamasin, ne jemi duke e sulmuar”, tha ai./rel
