Ashtu siç kishte paralajmëruar, opozita e bashkuar në këto momente është mbledhur për të protestuar tek Drejtoria e Policisë së Tiranës duke dënuar aktin e dhunimit të qytetarëve dhe të sekretarit organizativ, Sahit Dollapit.
Opozita ka nisur protestën para Drejtorisë së Policisë së Tiranës duke kërkuar lirimin e protestuesve të shoqëruar mbrëmjen e djeshme. Një grup qytetarësh janë grumbulluar para godinës, ndërsa të tjerë protestues pritet të vijnë nga Selia Blu së bashku me kreun e opozitës Lulzim Bashën.
Militantët e opozitës po protestojnë paqësisht para godinës, ndërkohë që kanë bllokuar qarkullimin e automjeteve.
Protestuesit kërkojnë të lirohen personat që u shoqëruan mbrëmjen e djeshme gjatë protestës së dhunshme.
Mësohet se, janë mbi 50 persona të shoqëruar, të cilët janë identifikuar nga policia se kanë kryer akte dhune gjatë protestës së djeshme.
Protestuesit kanë bllokuar qarkullimin në rrugën para Drejtorisë së Policisë, ndërsa bëjnë thirrje dhe për largimin e kryeministrit Edi Rama.
