Banorët e fshatit Dragostunjë në Librazhd janë ngritur në protestë për të kundërshtuar një vendim të Këshillit Bashkiak, i cili i jep një subjekti privat 10 hektarë tokë me qera për 10 vite. Kjo sipërfaqe sipas banorëve përdorej deri dje për nevojat e fshatit, për kullotjen e bagëtive dhe tashmë do ti jepet me qera Dashamir Bahitit duke lënë banorët e zonës pa kullota për bagëtitë.
“E ka marrë me qera për 10 vjet. Prona nuk ka shkuar tek i zoti. Të gjitha janë me certifikatë të ’46. Nuk e pranojnë të ’46 por të ’90. Fshati nuk është vënë në dijeni fare. Ne do vazhdojmë protestat, do bllokojmë Bashkinë,”-thanë banorët për Syri Tv.
Sipas banorëve ky vendim që ndikon shumë në ekonominë dhe mirëqenien e tyre, nuk është konsultuar fare me ta nga Bashkia.
Teksa banorët protestonin, nga ana e Bashkisë në fshatin Dragostunjë shkoi shefi i policisë bashkiake, Faik Balla, i cili i kërcënoi me ndjekje penale.
