Gjykata e Vlorës ka liruar shtatë muaj pas arrestimit të tij biznesmenin e njohur Pëllumb Petritaj.
Petritaj u arrestua pasi akuzohet nga prokuroria se përmes falsifikimit kishte arritur të përvetësonte rreth 100 hektar tokë në zonën e Karaburunit dhe Zvërnecit, në Vlorë dhe Himarë. Njeriu që nëpërmjet falsifikimit të dokumenteve ka mundur të zaptojë plazhet dhe sipërfaqet e tokës më të çmuara në Vlorë, ka dalë ka burgu falë një vendimi të dhënë nga gjyqtari i çështjes Ervin Trashi.
Ky i fundit ka pranuar kërkesën e Pëllumb Petritaj për zëvendësimin e masës së sigurisë nga “arrest në burg” në masë sigurimi me garanci pasurore prej 25 milion lekë të vjetra. Kjo shumë financiare është lënë si peng në gjykatë nga Petritaj, me qëllim lirimin e tij nga qelia.
Nga ana tjetër prokurori i çështjes ka kundërshtuar kërkesën për zëvendësimin e masës së sigurisë për Petritaj, por në fund të gjykimit gjyqtari Trashi ka pranuar kërkesën,duke çuar nga burgu në shtëpi “peshkun e madh” të tjetërsimit të pronave Pëllumb Petritaj. Nga ana tjetër prokuroria thotë se do apelojë vendimin duke kërkuar në Apel caktimin e masës së arrestit në burg për Petritaj.
Ky vendim lirimi i Petritaj tregon një zbehje totale të sistemit të drejtësisë që çdo ditë e më tepër po habit me vendimet që merren për lirimin e personave që nëpërmjet veprimtarisë kriminale, kanë sjellë dëme të parikuperueshme.
Në vitin 2018 Petritaj u dënua me 3 vite burg me akuzën e tjetërsimit të pronave në Vlorë, por në rrethana të dyshimta ai arriti t’i shpëtojë rrjetës së drejtësisë duke mos u marë as si i pandehur.
