Një koncesion që do i bëjë të gjitha koncesionet e shëndetësisë bashkë të duken si biznese tezgash pritet të shpallë tenderimin. Ky koncesion i dyshimtë që sipas gazetarit Klodian Tomorri ka shumë gjasa që të përfundojë në një dosje të re në SPAK pritet të vjelë miliona eruo nga qytetarët dhe bizneset në vendin tonë. Nëse miratohet ky koncesion atëherë sistemin e pagesave publike në Shqipëri do ta kontrollojë një kompani private. Koncesioni i jep të drejtë kompanisë private që të përfshijë çdo tarifë që bëhet nga qytetarët për shërbime të ndryshme apo biznese në shtet, duke përfshirë pagesën e taksave, tarifave dhe çdo detyrimi. Pra të gjithë buxhetin e shtetit!
Pak ditë më parë “Gazeta Reforma” publikoi një lajm ku bëhej fjalë për të dhënë me koncesion atë që në gjuhën teknike quhet infrastruktura e çelësave publikë (PIK). Kjo infrastrukturë aktualisht përfshin dy shërbime. Ato janë certifikata dixhitale për efekt të fiskalizimit si dhë nënshkrimi elektronik. Klodian Tomorri njoftoi se të ardhurat e këtij shërbimi kapin vlerën dysheme prej 10 milion euro në vit. “Certifikata e fiskalizimit dhe nënshkrimi elektronik janë pjesa më e vogël e këtij koncesioni. Llokma më e madhe është monopoli i sistemit kombëtar të pagesave publike,” tha një burim i mirëinformuar, në kushtet e anonimatit. Flitet për shifra të çmendura që mund të arrijnë deri në 500 milionë euro.
“Gazeta Reforma” tashmë ka siguruar dokumentacionin e gjerë që përfshin ftesën për ofertë që Ministria e Financave u ka dërguar 6 kompanive shqiptare, si dhe studimin paraprak të fizibilitetit të koncesionit. 6 kompanitë në fjalë janë: Fastech, Horizon, BNT Electronics, Image & Communications Development, Communications Progress dhe Soft & Solutions. Kjo e fundit është kompania favorite për të shtënë në dorë koncesionin multimiliarder.
