Kryetari i partisë më të madhe opozitare serbe, Zdravko Ponosh, ka deklaruar se përgjegjësi për sulmin e 24 shtatorit në Banjskë ku mbeti i vrarë një efektiv i Kosovës ka bërë një marrëveshje me autoritetet në Serbi dhe arrestimi dhe lirimi i tij pas një dite është pjesë e marrëveshjes.
“Jam i bindur se marrja e përgjegjësisë së plotë nga Radoiçiç për ngjarjen në Banjskë dhe paraqitja e tij në polici është rezultat i marrëveshjes së arritur mes tij dhe qeverisë së Serbisë. Besoj se lirimi i tij është gjithashtu pjesë e kësaj marrëveshjeje. Nuk është e papritur”, tha Ponosh për median serbe “Danas”.
Prokuroria e Lartë në Beograd ka njoftuar se do të apelojë vendimin e gjykatës për të mos e mbajtur në paraburgim Radoiçiç, i cili akuzohet për shumë krime në lidhje me sulmin e 24 shtatorit në Banjskë në veri të Kosovës.
