Deputeti i PD-së Ervin Salianji, ka ngriti alarmin për rendin dhe sigurinë në vend, nisur dhe nga ngjarjet e fundit gjatë fjalës së tij në Komisionin e Sigurisë. Ai deklaroi se krimi është fuqizuar gjatë qeverisjes së Ramës, duke sjellë në vëmendje rastin e fundit ku nga dëshmitë e të penduarit të drejtësisë Artan Tafani doli se banda e Laert Haxhiut kishte në plan të ekzekutonte prokuroren e SPAK.
“Z. kryetar më vjen keq që ju nuk jetoni fare me realitetin dhe çfarë ndodh në këtë vend. Ne nuk mund të fillojmë një mbledhje…prita në fakt të kishit një reagim për ngjarjet që ndodhin në Shqipëri…ky është komisioni i sigurisë Kombëtare dhe ju keni dëgjuar ose nëse nuk e keni dëgjuar është dita që ta rikthejmë në vëmendje të publikut dhe këtij komisioni që grupet kriminale kanë arritur në atë nivel për shkak të fuqizimit nën qeverisjen e maxhorancës tuaj që të kërcënojnë prokurorë të SPAK-ut që të vendosin në risk jetën e prokurorëve në këtë Republikë, të bëjnë përndjekje apo mbikëqyrje të prokurorëve dhe këto janë publikuar jo për shkak të ndonjë aksioni të Policisë së Shtetit, as për shkak të ndonjë merite të qeverisë, por për shkak se kriminelët të shtuar nën qeverisjen tuaj po kapin njëri-tjetrin dhe kur duan ta godasin njeri-tjetrin dhe nuk kanë mundësi, po përdorin policinë e shtetit për të goditur njëri-tjetrin, por ky është lajmi i mirë gjithsesi për çdo kriminel që përfundon para drejtësisë. Është në detyrën tuaj si kryetar komisionit dhe të komisionit që ta nisnit mbledhjen duke dhënë mbështetje për institucionet e sigurisë dhe drejtësisë në këtë vend duke kërkuar pa diskutim që për ngjarje të rënda të vijë dhe të japë shpjegim ministri i Brendshëm, kryetarja e SHISH dhe drejtori i Përgjithshëm i Policisë sepse u bënë ngjarje pas ngjarjesh që tentoni t’i mbuloni me tentativa për t’i kaluar në anale të pafundme, por këto sa po vijnë dhe po shtohen si ngjarje, sa po vijnë dhe po bie besimi i qytetarëve që qeveria mund të ketë ndonjë përpjekje për të luftuar apo për të qenë në krahun e atyre që luftojnë krimin dhe bandat kështu që besoj që është në nderin tuaj si maxhorancë, meqenëse nuk e nisët t’i jepni mbështetje tani, të gjithë bashkë dhe pa diskutim t’iu kërkojmë institucioneve që përmenda të vijnë dhe të përgjigjen për një ngjarje që në dijeninë time nuk ka ndodhur më përpara”, tha Salianji.
