Detaje të reja kanë dalë në dritë nga atentati me armë zjarri në Durrës ku mbeti i vrarë Fatjon Dervishi. Mësohet se 38-vjeçari u qëllua afër një ure, në mbikalimin e trenit në Sukth, ku edhe aktualisht ndodhet mjeti i viktimës, i cili në momentin kur ndodhi ngjarja ishte bashkë me një shok. Sipas dyshimeve të policisë mendohet se autorët e kanë ruajtur shënjestrën e atentatit dhe kanë pritur momentin kur makina ka ngadalësuar për të hyrë në mbikalim dhe e kanë qëlluar.
Ndërkohë, në vendin e ngjarjes ka mbërritur në Sukth dhe FNSH nga Tirana. Një prej pistave ku po heton policia është hakmarrja, pasi vëllai i viktimës ka pasur një konflikt ku ka plagosur një person dhe rezulton i skeduar për plagosje me armë dhe drogë, ndërsa pas hekurave ndodhet nën akuzën se ka qëlluar me armë zjarri një vajzë në një hotel në autostradën Tiranë-Durrës. Viktima nuk rezulton të ketë precedent të mëparshëm penal dhe jetonte në Gjermani ku ishte i martuar me një shtetase rumune. Kohët e fundit ai ishte duke ndërtuar një lokal në zonën ku banonte. Policia e ka të vështirë identifikimin e autorëve, pasi në zonën ku ka ndodhur ngjarja nuk ka kamera sigurie, pasi nuk ka asnjë ndërtim.
