Presidentja e Kosovës, Vjosa Osmani ka nderuar me urdhrin “Hero i Kosovës” oficerin e vrarë ditën e djeshme në veri të vendit, Afrim Bunjaku, Urdhri u pranua nga dy djemtë e efektivit të rënë në krye të detyrës.
“Në emër të qytetarëve i ndaj urdhrin më të lartë shtetëror “Heroi i Kosovës”, rreshterit Afrim Bunjaku. Ai ka rënë heroikisht në mbrojtje të vendit”, deklaroi presidentja.
“Ai ra në mbrojtje te dinjitetit të Republikës sonë. Kosova nga sot ka edhe një hero i cili sakrifikoi jetën për sigurinë e qytetarëve tanë. Afrim Bunjaku u sfidua nga bandat e Beogradit. Heroi ynë ishte një shtyllë e fuqishme e Policisë se Kosovës, ai tregoi trimëri të pashoq. Afrimi na kujton se heronjtë nuk lindin por bëhen me veprat e tyre. Republikën e Kosovës nuk do të arrij askush ta gjunjëzojë e ta ulë. Lavdi dhe qoftë i përjetshëm kujtimi për Afrim Bunjakun!”, ishin fjalët e Osmanit
Osmani tha se Policia e Kosovës riktheu ligjin dhe mbrojti integritetin territorial të Republikës së Kosovës që dje u sulmuan nga bandat terroriste të dirigjuara nga Beogradi. Në mbledhjen komemorative janë duke marrë pjesë krerët shtetërorë, ambasadorët të shteteve aleate, familjarët e Afrim Bunjakut dhe qytetarët. Presidentja e Republikës së Kosovës, Vjosa Osmani, në mbështetje të Kushtetutës së Kosovës, shpalli ditën e sotme, 25 shtator 2023, ditë zie shtetërore në nderim të policit Afrim Bunjaku, vrarë në veri të vendit.
