Ndalesa e protestave të studentëve duket se ka qenë e përkoheshme, pasi ditën e sotme disa studentë kanë zgjedhur të bojkotojnë mësimin. Bëhet fjalë pikërisht për studentët e Universitetit “Fan Noli” në Korçë të cilët kanë zgjedhur të bojkotojnë një orë mësimi si paralajmërim, ndërkohë që kanë paralajmëruar drejtuesit e institucionit për përshkallëzim të saj.
E gjithë kjo situatë është krijuar, pasi sipas tyre “Pakti për Universitetin” nuk është duke funksionuar dhe nuk është duke u zbatuar, ndaj kanë kërkuar me forcë Vetting-un e pedagogëve.
Gjithashtu një shqetësim me vend i tyre është edhe tregu i punës, pasi kjo është një nga çështjet më me rëndësi për ta.
Duke parë këtë reagim, rektori i universitetit, Ali Jashari ka zgjedhur që të thotë fjalën e tij për të qetësuar situatën. Jashari ka thënë se studentët kanë të drejtë sa i përket mungesës së tregut të punës, mirëpo Vetting-u në universitet do të bëhet, por është në proces përgatitja e bazës ligjore.
“Studentët kanë të drejtë sa i takon mungesës së hapësirave për punësim. Ne po punojmë që të hapim programe të reja punësimi. Kemi hequr dorë nga programet tradicionale, janë hapur 15 programe me karakter profesional për të cilat Korça ka nevojë. Sa i perket vetingut, po pergatitet baza ligjore. Po punojme per listen me literaturen baze. Tekstet do ti kene vitin tjeter ne biblioteka.”, tha ai.
