Kreu i Kishës katolike, Dodë Gjergji, bën të ditur se Vatikani ka njohur faktikisht Kosovën përmes veprimeve konkrete që ka ndërmarrë në lidhje me vendin, megjithëse ka ende dyshime në lidhje me njohjen ligjore. Gjergji, gjatë një interviste për KosovaPress, thekson se thirrja dhe përkushtimi i Kishës katolike në Kosovë për njohjen “me letra” të shtetit të Kosovës nga Vatikani është një proces i përsëritur dhe se përpjekjet për të arritur këtë qëllim nuk do të ndërpriten, megjithëse ai gjithashtu vlerëson rëndësinë e marrëdhënieve shtetërore.
“Në të vërtet Vatikani de-facto e ka njohur realitetin tonë dhe Kosovën, me hapat konkretë që i ka bërë ndaj nesh. Vatikani ka emëruar delegatin e vet të posaçëm për Kosovën, sikur një figur diplomatike që merret me relacionet në mes Vatikanit, Kishës dhe Kosovës.
Vatikani e ka njohur kishën vendore të Kosovës në Dioqezën Prizren dhe Prishtinë, sigurisht unë kam qenë dhe jam emëruar në këtë kontekstin e ri të personalitetit juridik kishtar. Vatikani ka pranuar të gjithë presidentët dhe kryeministrat e Kosovës në pritje te papët, sepse duke filluar nga Papa Gjon Pali II, Papa Benedikti dhe Papa Françesku. Komunikimi dhe relacionet janë në përmirësim e sipër.
Njohja de-facto është kurse de-jure është çështja e marrëdhënieve mes shteteve. Vatikani si kishë universale që e njeh Kosovën dhe realitetin dhe Vatikani si shtet. Marrëdhënia mes shteteve duhet të krijohet në bazë të relacionit që krijohen dhe rrethanave që janë”, thotë Gjergji.
Kryeministri i Kosovës, Albin Kurti është lideri i fundit që është pritur në Selinë e Shenjtë pak kohë më parë. Mirëpo, as ky dhe as të tjerë para tij që kanë pasur mundësinë të priten nga kreu i Vatikanit nuk janë konsultuar me Kishën në Kosovë.
“Do të donim që të konsultohemi më shumë përpara se të shkonin kjo do të ishte gjëja më e duhur, por personat veçantë që kanë pasur këtë mundësi që të shkojnë në selinë e shenjtë të takojnë Papën nuk e kanë parë të arsyeshme të konsultohen me neve”, vijon Gjergji.
Ipeshkvi i Dioqezës Prizren-Prishtinë, Dodë Gjergji, duke komentuar situatën e tensionuar të muajit të fundit në veri kërkon të ndërmerren veprime të matura pasi nuk duhet të rrezikojmë atë që e kemi fituar më 1999.
Gjergji shprehet se deri më tani janë parë “sjellje prej adoleshenti të një shteti” që bën gabim të mendojë se nuk ka nevojë për ndihmën e atyre që e sollën deri në këtë ditë.
