20 vite burg ka vendosur Gjykata e Shkallës së Parë në Berat për shtetasin Fetah Marra, i cili akuzohet për vrasjen e 63-vjeçares Fatime Suli. Kujtojmë se ngjarja e rëndë ka ndodhur mbrëmjen e 20 Janarit 2022 në fshatin Kozare në qytetin e Kuçovës. Ka qenë trupi gjykues i përbërë nga treshja e gjyqtareve: Ardiola Çela, Albana Misja dhe Entela Gjoni, me gjyqtare kryesuese Ardiola Çela, që ka vendosur sot dënimin me 20-vite burgim për shtetasin Fetah Marra. Në vendimmarrjen e saj, trupi gjykues i qëndroi masës së dënimit të kërkuar nga prokurori Elidon Hysenaj. Vendimarrja e gjykatës u mbështet në provat e shqyrtuara dhe të administruara gjatë shqyrtimit gjyqësor të kësaj çështjeje. Marra mbërriti në Gjykatën e Beratit rreth orës 15:00 minuta nën masa të rrepta sigurie,ndërkohë që gjyqi i tij u krye me dyer të mbyllura. Po kështu,trupi gjykues ka dhënë dënimin me 1-vit burg edhe për shtetasin Izet Marra, i akuzuar për mos kallëzim krimi.
Avokati i familjes Suli, Ramiz Oboni, ka deklaruar se, janë të pakënaqur me vendimin dhe se do ta apelojnë atë. Sipas avokatit Oboni, Fetah Marra nuk duhet të dënohej vetëm për vrasje pasi ai fillimisht e ka përdhunuar viktimën dhe më pas e ka vrarë atë dhe e ka hedhur në kanal gjysmë të zhveshur.
Avokati Ramiz Oboni: Do apelojmë vendimin, Fetah Marra nuk duhet të dënohej vetëm për vrasje,e përdhunoi dhe më pas e vrau.
