Kryeministri Edi Rama teksa ndodhet në Vilnus të Lituanisë për samitin e NATO-s ka zhvilluar një bashkëbisedim me Eksperten e Qendrës Europiane të Këshillit të Atlantikut, Rachel Rizzo, mbi “Sfidat sistematike ndaj vlerave dhe interesave të përbashkëta”.
Ndër të tjera kryeministri shqiptar nuk la pa cekur edhe temën më të nxehtë të momentit, situatën në veri të Kosovës. Nga atje Rama është shprehur se situata është shumë e rrezikshme dhe mund të eskalojë deri në hapje konflikti.
Rama theksoi se ka një palë të tretë mes Kosovës dhe Serbisë e cila po ngre grupet ekstremiste dhe kjo po ndodh teksa Bashkimi Europian po ndërmjetëson dialogun midis dy vendeve.
“Jam shumë i rehatuar nga fjala e presidentit Biden sot në Këshill, që foli për këto tema. Problemi i Ballkanit Perëndimor sot, në lidhje me sigurinë, ndoshta mund të mos jetë në të njëjtën madhësi, të problemit të madh ukrainas, por nuk është aq e vogël sa të trajtohet si diçka e pavlefshme. Dhe çfarë po ndodh, diçka që është vërtetë shumë e rrezikshme me veriun e Kosovës, që të bëhet një vatër zjarri me një kërcenim të hapjes së konfliktit dhe teksa lehtësimi i dialogut të BE-së punon me të dyja palët, me Beogradin dhe Prishtinën, ka një palë të tretë që është duke u ngritur, grupet ekstreme në veriun e Kosovës”, theksoi ai.
