Kryeministri Edi Rama në datat 6-7 korrik, do të zhvillojë një tur ballkanik në kuadër të Procesit të Berlinit, dhe nismës “Open Ballkan” ku për këtë të fundit tha se e ka kryer tashmë misionin e tij. Bëhet me dije se Rama do të jetë i shoqëruar dhe nga një pjesë e kabinetit qeveritar.
Pritet që kryeministri të vizitojë Prishtinën, Beogradin, Shkupin, Sarajavën dhe Podgoricën.
Raportohet se kryeministri Rama do të zhvillojë takime me krerët e shtetve të Ballkanit Perëndimor në kuadër të Procesit të Berlinit dhe të ardhmes së nismës ‘Open Balkan’.
Vlen të kujtojmë se vetëm pak ditë më parë, kryeministri Rama bëri të ditur me anë të një interviste për ‘Euronews Albania’ se nisma Open Balkan e kreu misionin e saj dhe tashmë vendet e Balkanit Perëndimor do të duhet të fokusohen “kokë e këmbë” te Procesi i Berlinit.
“Në tetor Shqipëria pret për herë të parë Samitin e Berlinit. Ne duhet të futemi me kokë tani në procesin e Berlinit sepse e kemi këtë mundësi. Ballkani i Hapur ishte një iniciativë që lindi nga nevoja për ta shtyrë përpara procesin e Berlinit dhe e ka kryer atë mision për të cilin lindi”, deklaroi Rama në ‘Euronews Albania’.
