Pas ngjarjes së rëndë që ndodhi në Krujë ku mbeti një viktimë dhe 2 të plagosur, Policia e Shtetit ka shoqëruar tre persona, që dyshohet se kanë dijeni për atë që ka ndodhur. Ndërkohë që bëhet e ditur sipas burimeve zyrtare se janë ushtruar 3 kontrolle në 3 banesa. Theksojmë se është vrarë Ramazan Sino dhe u plagosën dy nipat e tij të mitur, djemtë e Gentian Bejtjas, i cili ishte edhe shënjestër e atentatit. Policia bën me dije se ngjarja po hetohet dhe se do të ketë një njoftim tjetër për shtyp ku do të jepen detaje.
“Në lidhje me informacionin paraprak të dhënë mbrëmë, për ngjarjen e ndodhur në oborrin e banesës së shtetasit G. B., ju bëjmë me dije se:
Ka ndërruar jetë si pasojë e plagëve të marra shtetasi R. S., 29 vjeç, si dhe janë plagosur dhe ndodhen në spital, nën kujdesin e mjekëve, dy të mitur të moshës 13 dhe 10 vjeç, (nipat e shtetasit R. S).
Me qëllim identifikimin dhe kapjen e autorit/ëve të dyshuar, shërbimet e Policisë kanë ushtruar 3 kontrolle në 3 banesa si dhe kanë shoqëruar 3 persona që mund të kenë dijeni për ngjarjen.
Në përfundim të veprimeve hetimore në lidhje me ngjarjen, do të ketë një njoftim për shtyp në vijim”, njoftoi zyrtarisht Policia e Shtetit.
