Një akt i rëndë anti-islamik ka ndodhur në Suedi ku 2 persona kanë djegur një kopje të librit të shenjtë të Islamit, Kuranit. Ngjarja ka ndodhur jashtë një xhamie në kryeqytetin suedez.
Dy burra në Suedi morën pjesë në një protestë që përfshiu djegien e një Kurani jashtë një xhamie, në qendër të kryeqytetit Stokholm të mërkurën, ditën e parë të festës myslimane të Kurban Bajramit. Disa vende islamike kanë dënuar ashpër aktin e paprecedentë. Një prej tyre ishte Arabia Saudite.
”Këto akte të neveritshme dhe të përsëritura nuk mund të pranohen me asnjë justifikim. Ato nxisin në mënyrë eksplicite urrejtje, përjashtim dhe racizëm”, shtoi në një deklaratë Ministria e Jashtme e monarkisë.
Egjipti gjithashtu një vend me shumicë myslimane bëri një dënim të ngjashëm, duke e quajtur atë “një akt të turpshëm që provokon ndjenjat e myslimanëve në mbarë botën”. Në përgjigje, Maroku tërhoqi ambasadorin e tij në Suedi për “konsultim të pacaktuar”, njoftoi agjencia zyrtare e lajmeve të vendit MAP.
Ministria e Jashtme marokene gjithashtu thirri të ngarkuarin me punë të Suedisë në Rabat dhe informoi diplomatin për refuzimin e Marokut “për këtë akt të papranueshëm”. Liga Arabe përmes shefit të saj, Ahmed Abul Gheit dënoi me forcë indiferentizmin e autoriteteve suedeze.
