Ditën e sotme, gjykata në Serbi ka marrë vendimin për lirimin e 3 efektivëve të Policisë së Kosovës, të rrëmbyer që prej 14 qershorit 2023
Telegrafi mëson se Gjykata në Kralevë ka marrë vendimin për lirimin e Rifat Zekës, Beqir Sefit dhe Mustafë Shemit.
Policia ndërsa kishte konfirmuar arrestimin e tyre nga forcat serbe kishte thënë se “njësia policore patrulluese e kufirit ka qenë me detyre në pikë statike në vendin e quajtur Tresave/Bare, thellë brenda në territorin e Republikës së Kosovës, për të parandaluar shfrytëzimin e rrugëve ilegale, të cilat shfrytëzoheshin nga grupet kriminale për kalim ilegal dhe kontrabandë”.
Sekretari në zyrën ndërlidhëse të Kosovës në Beograd, Fatmir Haxholli, ka publikuar foton në krah të tre policëve që u mbajtën në paraburgim në Serbi që nga data 14 qershor.
Ata shihen në gjendje të mirë shëndetësore, teksa më në fund pa shumë peripecish dhe thirrjeve të ndërkombëtarëve, janë lënë të lirë.
Arrestimi i tre policëve ka nxitur reagime të shumta në vend, ku u kërkua lirimi i menjëhershëm dhe pa kushte.
Lirimin e tre policëve e kanë kërkuar Bashkimi Evropian dhe Shtetet e Bashkuara të Amerikës.
Ministri i Mbrojtjes së Serbisë, Millosh Vuçeviç njëherësh edhe kryetar i Partisë Përparimtare Serbe ka propozuar një plan me 4 pika për uljen e tensioneve në veri të Kosovës të banuar me serbë etnikë. Në një postim në rrjete sociale Millosh Vuçeviç, propozon bisedime për arrestimet e paligjshme, për tërheqjen e njësive speciale, për themelimin e Asosacionit të Komunave me shumicë serne dhe për pjesëmarrjen e serbëve në zgjedhjet lokale. “Duhet të ketë bisedime për arrestimet e paligjshme. Duhet të ketë bisedime për tërheqjen e njësive speciale. Duhet të ketë bisedime për themelimin e Asociacionit të Komunave (me shumicë) Serbe dhe të flasim për pjesëmarrjen e serbëve në zgjedhjet lokale. Për mendimin tim, këto janë katër pikat që duhet të jenë bazamenti i zgjidhjes së kësaj situate, nëse me të vërtetë duam të lëvizim në drejtimin e shtensionimit”, ka thënë ndër të tjera Vuçeviç, ndërsa ka fajësuar kryeministrin e Kosovës, Albin Kurti, për siç tha “rrezikim të sigurisë së Serbisë”.
