Teksa situata sa vjen e tensionohet mes Kosovës dhe Serbisë, Ministria e Jashtme e Kosovës ka dalë me një njoftim ku iu bën thirrje qytetarëve të saj të evitojnë kalimin nëpër Serbi. Gjithashtu në njoftim Ministria iu bën thirrje emigrantëve në Serbi që të kthehen në atdhe. Ky njoftim vjen menjëherë pas rrëmbimit të 3 policëve të Kosovës nga forcat serbe ‘Kobra’. Kujtojmë se ditën e djeshme u arrestua serbi Millun Millenkoviq, Lune, i cili akuzohet nga autoritetet në kosovë se është një prej organizatorëve të sulmeve ndaj KFOR dhe forcave speciale në veri. Kryeministri Albin Kurti më herët akuzoi Serbinë se ka qëllim destabilizimin e Kosovës.
NJOFTIMI:
“Informacion i rëndësishëm për të gjithë ata që janë duke udhëtuar drejt Kosovës.
Ju lutemi, ndiqni me vëmendje situatën e tensionuar të sigurisë dhe mos udhëtoni përmes Serbisë.
Të gjithë bashkatdhetarët dhe qytetarët që janë në lëvizje njoftohen të shfrytëzojnë pika të tjera kufitare për qarkullim deri në një informim tjetër zyrtar nga ana e institucioneve të Republikës së Kosovës.
Duke marrë parasysh faktin që në qarkullim janë shumë lajme të rreme, të cilat synojnë përhapjen e frikës dhe kaosit, ju lutemi të ndiqni @Kosovo_Police rreth përditësimeve më të fundit zyrtare në këtë drejtim”- thuhet në njoftimin zyrtar.
