Vetëm dy ditë më parë Kavaja u trondit nga vrasja e Arjan Gosës, i cili u qëllua për vdekje në sy të babait. Kjo ngjarje shokoi jo vetëm Kavajën por mbarë opinion publik.
Vrasja ndodhi për arsye hakmarrje. Osman Gosa, që pa djalin t’i vritej përpara syve ka treguar për policinë momentin më të rëndë në jetë, vrasjen e të birit.
“Ne nuk mendonim se ngjarja e marsit do të vazhdonte. Në ngjarjen e parë, vdiqën të dy. Nuk kishte pse të vazhdonte më kjo histori. Ne nuk ruheshim, pasi s’na shkonte ndër mend që familja Rexha do të vazhdonte. Djali im Arjani pak ditë më parë kishte ardhur nga Italia, pasi jetonte atje. Dolëm të pinim kafe dhe të ndiqnim ndeshjen Napoli-Inter.
Ishim ulur të ajo tavolina aty, pasi konsumonim cigare dhe ishim kthyer me shpinë nga rruga dhe po shikonim ndeshjen. Nuk e pamë fare. Vetëm kur plasi arma. Ktheva kokën dhe pash që Arjani u këput dhe pashë një person që doli me vrap. U shokova kur pashë tim bir të goditur në kokë. S’kishte asnjë shpresë, humbi jetën menjëherë. Nuk di çfarë te them më shumë” ka deklaruar Osman Gosa, babai i Arjan dhe Armand Goses.
