Një shtetas malazez ka rënë në prangat e policisë këtë të hënë, pasi nuk kishte deklaruar një shumë parash që kishte me vete, sipas përcaktimeve ligjore në fuqi. Shtetasi me inicialet A.T, banues në Zvicër kishte me vete 12 480 franga zvicerane dhe 900 euro, shumë e cila i është sekuestruar, si dhe është proceduar në gjendje të lirë nga policia.
Njoftimi i Policisë
Policia Kufitare e Rinasit, në vijim të kontrolleve për parandalimin, evidentimin dhe goditjen e krimeve ndërkufitare, bazuar dhe në analizën e riskut, në dalje të RSH-së, kanë kaluar në vijën e dytë, për kontroll më të detajuar, shtetasin malazez A. T.
Gjatë kontrollit, këtij shtetasi i janë gjetur të fshehura në trup dhe në çantën e dorës, 12 480 franga zvicerane dhe 900 euro, të cilat ai nuk i kishte deklaruar në kufi, sipas përcaktimeve ligjore në fuqi.
Në përfundim të veprimeve, shuma e parave u sekuestrua në cilësinë e provës materiale dhe nisi procedimi në gjendje të lirë për shtetasin malazez A. T., 30 vjeç, banues në Zvicër, për veprën penale “Mosdeklarimi në kufi i të hollave dhe i sendeve me vlerë”.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
