Kanë ecur përpara hetimet në lidhje me vdekjen e shtetases keniane Joy Aoko. Mësohet se policia ka shoqëruar 6 persona dhe ka zhvilluar kontrolle të hollësishme në 4 banesa. Mësohet se kontrollet janë zhvilluar gjatë natës dhe orëve të paratë mëngjesit.
Policia dhe prokuroria janë vënë në aksion 9 muaj nga vdekja e 22-vjeçares e cila punonte në një kazino në Tiranë, ndërsa së fundi është bërë e mundur dhe zhbllokimi i telefonit të saj, nga ku kanë dalë edhe kontaktet e fundit që ajo ka pasur.
Në mesin e personave që kanë shoqëruar është edhe shoferi i kazinosë ku Joy punonte, shtetasi me inicialet R.B., ndërsa në pyetje është marrë dhe i vëllai i tij. Hetuesit po punojnë për zbardhjen e plotë të ngjarjes. Joy Aoko u gjet e rrëzuar nga kati i tretë i banesës ku jetonte me qira, pranë vilave gjermane në gusht të vitit 2022. Ajo shtrua në spitalin e Traumës më datë 14 gusht 2022. 22-vjeçarja i mbijetoi fillimisht plagëve të marra, por një dëmtim në tru e la në gjendje vegjetative. E reja nuk i mbijetoi dot dëmtimeve të marra, duke ndërruar jetë 6 muaj pas ngjarjes së rëndë, në një spital jashtë vendit ku u transferua nga familja e saj.
