Çdo ditë e më shumë bluzat e bardha largohen drejt Gjermanisë si një vend ku ofrohet mundësia që të ushtrohet profesioni i mjekut dhe infermierit.
Teksa ky fenomen është shqetësues për krizën që do shkaktojë tek vendi ynë, kryeministri Rama e trajtoi si çështje edhë gjatë konferëncës së përbashkët që pati me kancelarin gjerman Scholz.
Rama u shpreh se ka diskutuar me homologun e tij për të gjetur një zgjidhje që Shqipëria të balancojë atë që humbet pas ikjes së mjekëve nga sistemi shëndetësor shqiptar.
“Kemi diskutuar edhe këtë çështje. Ne nuk mund ti kërkojmë Gjermanisë dhe asnjë vendi të BE-së, që të ndalojë lëvizjen e lirë të kapitalit njerëzor dhe të ndalojë lëvizjen e lirë të atyre që nga Shqipëria duan të provojnë jetën në profesionin e tyre. Kemi diskutuar me Kancelarin se si duhet të gjejmë mënyra që faktikisht Shqipëria të mos jetë financuesi i drejtpërdrejtë i sistemit shëndetësor gjerman. Unë i kam shpjeguar Kancelarit që studentët tanë të mjekësisë paguajnë 1/16 të kostos, ndërkohë që pjesën tjetër e paguan Qeveria. Është shumë e rëndësishme që të gjejmë një rrugë, që të jetë një rrugë europiane për të balancuar atë që Shqipëria humbet në këtë fazë kaq të rëndësishme”, tha Rama.
Ndërsa kancelari gjerman u shpreh se “Ne folëm për këtë çështje. Është një sfidë e madhe. Lëvizja e lirë është arritje e madhe e BE-së. U ka dhënë ndjesinë qytetarëve që nuk mund të udhëtosh vetëm si turist. Me këtë liri sot janë lidhur edhe shumë sfida. Është shumë e rëndësishme që vendi ynë ndihet përgjegjës që nevojën e madhe për vende pune të mos e mbulojë vetëm nga vendet e BE-së, por edhe jashtë saj”.
