Një 72- vjeçar ka ndërruar jetë si pasojë e një aksidenti automobilistik në aksin nacional Berat-Lushje,në fshatin Polizhan. 72-vjeçari po udhëtonte me biçikletë kur është përplasur nga një makinë, e cila pas aksidentit është larguar nga vendngjarja. Sipas burimeve mësohet se viktima është identifikuar si Idajet Çobo, ndërsa policia është vendosur në lëvizje për të identifikuar autorin që shkaktoi aksidentin tragjik dhe për ta arrestuar atë.
Mësohet se Idajet Çobo është gjetur i shtrirë në rrugë nga drejtuesit e makinave të tjera që kanë qarkulluar më pas, të cilët kanë njoftuar policinë. 72-vjeçari është transportuar me ambulancë drejt Spitalit Rajonal Berat por nuk ka arrritur t’i mbijetojë plagëve të marra dhe ka gjetur vdekjen gjatë rrugës.
Trupi i pajetë i viktimës Çobo është transportuar në Morgun e Spitalit Rajonal Berat, ku do ti nënshtrohet autopsisë mjeko-ligjore. Efektivë të shumtë policie janë duke punuar për identifikimin dhe kapjen e autorit të aksidentit,duke kërkuar edhe kamerat e mundshme të bizneseve apo banesave në anë të rrugës, nëpërmjet të cilave të bëjnë të mundur edhe identifikimin e targave të mjetit që e ka goditur.
Njoftimi paraprak i policisë
Rreth orës 18:00, në aksin rrugor Berat-Ura e Kuçit, në vendin e quajtur “Polizhan”, një automjet me drejtues ende të paidentifikuar, ka aksidentuar shtetasin I.Ç., 72 vjeç, i cili si pasojë e aksidentit ka ndërruar jetë në vendngjarje.
Grupi hetimor po punon për zbardhjen e ngjarjes, identifikimin dhe kapjen e drejtuesit të mjetit.
