Siç ishte paralajmëruar kanë nisur këtë të mërkurë punimet për ndërtimin e Teatrit të ri Kombëtar. Zona është blinduar nga forcat e policisë, të cilët kanë krijuar një kordon sigurie. Pjestarë të Aleancës për Mbrojtjen e Teatrit dhe qytetarë të thjeshtë janë mbledhur për të kundërshtuar projektin e qeverisë. Të pranishëm sot janë kryetari i bashkisë së Tiranës, Veliaj dhe kryeministri Rama. Veliaj i cili ka mbërritur pak minuta më parë, i shoqëruar nga aktori i humorit Gazmend Paja është pritur me kritika dhe akuza nga qytetarët.
Në orën 10:30 pritet që të mbërrijë edhe kryeministri Edi Rama për përurimin e punimeve.
Një qytetar ka deklaruar për ‘Syri Tv’ se ka ardhur nga Franca për të mbështetur protestën për Teatrin , si dhe i ka bërë thirrje qeverisë që të ndërtohet teatri ashtu siç ishte.
Qytetari: Është një maskaradë e këtij shteti që s’ka të sosur nga prapësitë që i shkakton këtij populli. Është një vjedhje e madhe, një vjedhje e një karakteri të jashtëzakonshëm, një tejkalim pronësie nga ministria në bashki, nga bashkia te fadromat; nga fadromat prapë tek fadromat nga kërkesa për një Teatër aty ku ishte dhe siç ishte, tek një Teatër të modelit Veliaj që vetëm ai e di se kujt do t’i shërbejë.
