Ish kreu i PD, Lulzim Basha ka reaguar sot pas incidentit të ndodhur ku Berisha u sulmua me grusht nga një person, që u identifikua si Gert Shehu 31-vjeç. Përmes një postimi në rrjetin social Twitter Basha thekson se dhuna nuk mund të jetë kurrë zgjidhja dhe se kjo që ndodhi sot duhet të hetohet plotësisht.
“Dënoj ashpërsisht sulmin fizik ndaj z. Berisha. Kjo ngjarje duhet të hetohet dhe të zbardhet plotësisht. Dhuna nuk mund të jetë kurrë zgjidhje. Ajo është vetëm tregues i një vendi pa zgjedhje të lira, pa drejtësi, pa demokraci funksionale dhe me korrupsion të pandëshkuar.”- shkruan Basha.
Si ndodhi ngjarja:
Gerti Shehu, 31-vjeç sulmoi gjatë protestës së të martës kreun e PD-së Sali Berisha, teksa ky i fundit ishte duke marshuar drejt bulevardit “Dëshmorët e Kombit” për t;ju bashkuar protestës.
31-vjeçari goditi me grusht në fytyrë Berishën duke e gjakosur duke iu shpëtuar vëmendjes së truprojave. Më pas Shehu u godit dhe u dhunua nga protestues dhe mbështetës të Berishës.
31-vjeçari u shoqërua nga policia dhe ndërkohë po merr mjekim në spitalin e Traumës, pasi ka dëmtime në fytyrë dhe fraktura në hundë. Oficerët kanë tentuar dy herë për të marrë në pyetje të riun, por për shkak të gjendjes së tij shëndetësore, ai nuk ka dhënë deri tani asnjë dëshmi. Dyshohet se 31-vjeçari vuan nga probleme të shëndetit mendor. Në lidhje me ngjarjen e rëndë Berisha u shpreh se gjithçka është e organizuar nga Edi Rama.
