Publikimet e hakerave po tregojnë se asgjë nuk është më sekret në këtë shtet, pasi gjithçka ka pasur sistemi është arritur të merret nga hakerat.
Ditën e djeshme pati një publikim të disa e-maileve të drejtorit të SHISH, Helidon Bendo ku kanë dalë të zbuluar detaje të rëndësishme dhe tepër sekrete në lidhje me rrjetin agjenturor të vendit.
Gazetari Artan Hoxha në një intervistë për Abc Neës bëri një deklaratë tronditëse pasi u shpreh se nga rrjedhja e këtyre të dhënave rrezikohet në mënyrë të drejtpërdrejtë jeta e punonjësve të SHISH si edhe informatorëve që punojnë për sigurinë e vendit brenda dhe jashtë territorit të Shqipërisë.
“Kjo ka dëmtuar rrjetin agjenturor të vendit dhe unë kam thënë edhe më parë që SHISH duhet të rindërtojë rrjetin a agjentëve pasi tani janë zbuluar të gjithë”, tha Hoxha.
Ndërkohë sipas gazetarit ndonëse ka pasur një rrjedhje masive të dhënash askush deri më tani nuk ka mbajtur përgjegjësi për rrjedhjen e të dhënave dhe sulmin kibernetik ndaj rrjeteve tona, përmes të cilës hakerat morën çfarë deshën.
“Ore si ka mundësi që u bën muaj që ata publikojnë të dhëna dhe këtu askush nuk reagon. Do mbajë dikush përgjegjësi në këtë vend?! Po si ka mundësi që na kanë shpartallur dhe askush nuk mabn përgjegjësi për diçka kaq të madhe që ka ndodhur?!”, tha Hoxha duke shtuar se në vende të tjera për shembull, siç është Greqia, një listë e personave të përgjuar ka shkaktuar tërmet në opinionin publik.
“Nuk po bëjmë asgjë në këtë drejtim dhe po i lejojmë armitë tanë që të na dëmtojnë edhe më tepër”, tha Hoxha.
