Rudina Hajdari ka mohuar të ketë patur ndonjë rol në themelimin e partisë “Bindja Demokratike.”
Deputetja demokrate ndër të tjera ka theksuar se është ftuar nga themeluesit e partisë “Bindja Demokratike”, për të qenë pjesë e saj, por nuk ka pranuar për shkak të prioriteteve të saj në parlament.
Në emisionin “Përballë” në RTSH, Hajdari mohoi të ketë patur ndonjë rol në themelimin e kësaj partie duke shpjeguar edhe fotografinë që qarkulloi disa ditë më parë në media, ku dukej teksa diskutonte me Astrit Patozin. Hajdar tha se fotografia është e disa kohëve më parë.
“Megjithëse nuk më pëlqejnë veprimet e nxituara, unë jam e hapur,” – u shpreh Hajdari duke mos e mohuar kategorikisht mundësinë për t’iu bashkuar dikur në të ardhmen kësaj force të re politike.
Pjesë nga deklarata e Rudina Hajdarit:
Krijimi i partisë Bindja Demokratike, ishte ndoshta një projekt i vjetër i filluar prej disa personave të cilët e shprehën dëshirën dhe më ftuan në këtë projekt, por unë nuk kam pasur asnjë lloj lidhje me themelimin e kësaj partie.
Më shprehën ftesën sepse unë isha pro mos-bojkotimit të zgjedhjeve dhe formimit të një forumi demokratik që do të përfaqësonte demokratët. Fatkeqësisht partitë sot kanë zgjedhur një mënyrë jo ligjore, me veprime që nuk i shkojnë për shtat një vendi që do të hyjë në bashkimin europian.
Por prioriteti im kryesor do të jetë grupi parlamentar demokrat. Ne kemi objektiva të qarta për punën që do të merret ky grup. Nuk dua që gjërat të ndodhin shpejt dhe me nxitim. Patjetër unë jam e hapur, dhe i uroj suksese çdo lloj formimi që zgjedh forma demokratike, siç është pjesëmarrja në zgjedhje. Pak herë e kam takuar zotin Patozi dhe ato foto që kanë qarkulluar kanë qenë nga të parat foto që unë e kam takuar.
