Shkon në pesë numri i personave që janë arrestuar për grabitjen në aeroportin e Rinasit.
Është arrestuar në Bullgari autori i pestë i grabitjes së 9 prillit në aeroportin e Rinasit.
Policia e Shtetit jep detaje për arrestimin e personit të pestë, të dyshuar si pjesëmarrës në grabitjen e miliona eurove në aeroportin e Rinasit.
Raportohet se shtetasi Elton Pikuli, 32 vjeç, banues në Fushë Krujë, u arrestua mbrëmë në mesnatë.
Sipas “balkanweb” i dyshuari i pestë si autor i supergrabitjes në aeroport pritet të vijë drejt Shqipërisë nën masa të rrepta sigurie. Sakaq operacioni për arrestimin e personave të tjerë të implikuar në këtë ngjarje vijon nga policia e Shtetit.
“Në vijim të veprimeve të kryera nga një grup i posaçëm hetimor për zbardhjen e ngjarjen së datës 09.04.2019 në aeroportin e Rinasit, ju informojmë se mbrëmë në mesnatë është kapur dhe ndalur shtetasi E.P., banues në Krujë, i dyshuar si një prej autorëve të kësaj ngjarje.
Materialet proceduriale i kaluan Prokurorisë Pranë Gjykatës së Shkallës së Parë për Krime të Rënda Tiranë për veprën penale të ‘Vjedhjes me armë të kryer në bashkëpunim’ në kuadër të ‘Grupit të Strukturuar Kriminal’, ‘Mbajtjes pa leje e armëve dhe municioneve luftarake’; ‘Vrasje e Punonjësve të Policisë’ e kryer në bashkëpunim e mbetur në tentative,” -deklaron policia.
Ndërkohë që para dy ditësh u arrestuan; Oltian Veseli, Alkon Bengasi, Renaldo Sula dhe Saimir Çela.
Ndaj 4 të arrestuarëve rëndojnë akuzat e “Vjedhjes me armë të kryer në bashkëpunim” në kuadër të “Grupit të Strukturuar Kriminal”, ”Mbajtjes pa leje e armëve dhe municioneve luftarake”, “Vrasje e Punonjësve të Policisë “ e kryer në bashkëpunim e mbetur në tentativë.
