I riu në foto është 32-vjeçari Lear Kurti, i cili humbi jetën tragjikisht në ambientet e komisariatit nr.3 të Tiranës, në rrethana ende të paqarta. Autoritetet kanë bërë me dije se Kurti dyshohet se vdiq pas një ataku kardiak. Ndërkohë sipas burimeve mësohet se 32-vjeçari ka mbërritur i pajetë në Spitalin e Traumës. Por si ndodhi ngjarja?
Gjithçka nisi kur rreth orës 23:07, kur një nga Patrullat e Komisariatit të Policisë Nr. 3 Tiranë, kanë parë në rrugën “Riza Cuka” një shtetas të cilit i kanë bërë thirrje të ndalojë, për të kryer një verifikim rutinor, me qëllim për t’i kontrolluar dokumentet e identifikimit.
Por viktima Lear Kurti nuk i është bindur thirrjes së policisë për të ndaluar dhe ka tentuar të largohet, por nuk ia ka dalë dot. Punonjësit e policisë kanë arritur ta arrestojnë dhe më pas e kanë shoqëruar për në ambientet e komisariatit Nr.3. Ajo që ka ndodhur me të riun në ambientet e komisariatit mbetet ende e paqartë, pasi policia nuk ka bërë transparencë në lidhje me ngjarjen.
Ndërkohë, agjencia e Mbikëqyrjes Policore, nën drejtimin e Prokurorisë së Tiranës ka ngritur menjëherë grupin hetimor, i cili po kryen veprimet e para hetimore për sqarimin e plotë të rrethanave të ngjarjes. Gjithashtu, aktualisht po kryhen ekzaminimet mjeko-ligjore për përcaktimin e shkakut te vdekjes dhe në përfundim AMP do të dalë me një njoftim përfundimtar për shtyp.
Kujtojmë se ky rast është pothuajse identik me atë të Klodian Rashës, i cili u vra në derë të shtëpisë se kishte shkelur orarin e lejuar të daljes gjatë kohës së karantinës. Duket se policia nuk po merr masa për të ‘edukuar’ punonjësit e saj të cilët kanë për detyrë të mbrojnë qytetarin, jo ta vrasin atë.
