Procedura ligjore për krijimin e partisë së re politike “Bindja Demokratike”, pritet të formalizohet paraditen e së martës, që përkon edhe me afatin e fundit të regjistrimit të partive politike në Komisionin Qendror të Zgjedhjeve për garën elektorale të 30 Qershorit.
Tashmë kjo parti e re politike i ka gati firmat për t’u regjistruar në Gjykatën e Tiranës. Sipas burimeve partia e re nuk e ka zyrtarizuar ende kryetarin e saj. Por “klan tv” mëson se ajo do të drejtohet nga ish-nënkryetari i Partisë Demokratike, Astrit Patozi.
Rudina Hajdari, që mendohej se do të ishte pjese e kësaj partie politike, mësohet se është tërhequr përkohësisht nga ky projekt.
Deputetja që kryeson grupin e ri demokrat në parlament pati një takim me Patozin të shtunën për të diskutuar mbi detajet e grupimit të ri politik, por burimet thonë se në momentin final, ajo ka hezituar për të qenë në krye të partisë dhe ka kërkuar më tepër kohë.
Teksa pritet zyrtarizimi i emrit të kryetarit, “Bindja Demokratike” ka formalizuar Bordin e saj, në të cilin bëjnë pjesë ish-anëtarë të Këshillit Kombëtar të Partisë Demokratike, si Endira Bushati, Leonard Olli, Fabian Topollaj, apo dhe Ardian Kollozi.
Astrit Patozi njihet si një ndër zërat më kritikë ndaj Lulzim Bashës. Ai ndërmori pak kohë më parë edhe një lëvizje për “Ringritjen e Partisë Demokratike”, që synonte demokratizimin e kësaj force politike.
