Mungesë llogaridhënie/ Pse Komisioni Parlamentar i Sigurisë zhvillon seancën pa media, kur gjithçka e shqiptarëve ka dalë sheshit?

Këtë të premte Komisioni Parlamentar i Sigurisë ka zhvilluar mbledhjen e rradhës në lidhje me hakërrimin e sistemeve elektronike nga hakerat. Njejtë si herën e kaluar mbledhja u zvillua me dyer të mbyllura, pa praninë e mediave. Sot ishte një seancë mjaft e vlefshme për qytetarët, pasi do mbahej seanca dëgjimore me AKSHI-n, institucioni nga i cili rrodhën të dhënat e të gjithë shqiptarëve dhe më pas u nxorën në pazar për shitje. Motivacioni pse kjo seancë po zhvillohet me dyer të mbyllura është se do të trajtohen informacione sekrete, por çfarë ka mbetur sekret më në këtë vend ku gjithçka mund të merret online me ose pa pagesë në varësi të rëndësisë. Hakerimi ka filluar prej 14 muajsh dhe hakerat kanë treguar se kanë thyer edhe sisteme të mbyllura si Tims apo MEMEX, të cilët mund të hakohen vetëm nga brenda, pra janë të pacënueshme nga jashtë. Por si erdhën hakerat deri tek këto sisteme? Fillimisht ishin të dhënat e patronazhistëve me të cilat krenohet edhe kryeministri dhe këto të dhëna dolën nga AKSH-i. Hakeruesit më pas e kishin më të lehtë të pikasnin personat që punonjnë nëpër institucione, pasi e kishin në dorë listën, falas. E kush ka mbajtur përgjegjësinë për këto të dhëna që dolën? Askush! Dhe sot drejtoresha e AKSH Linda Karcanaj përzë mediat nga seanca e llogaridhënies. Kryetari i komisionit, Nasip Naço, ka qenë i gatshëm për të mbyllur dyert për mediat. Megjithëse për procedurë është hedhur për votim edhe kërkesa e Karcanaj është miratuar me votat e socialistëve të cilët më shumë se të gjithë janë të interesuar që ta mbulojnë dështimin e shtetit përballë sulmeve kibernetike.Ndërsa nga tre deputetët e opozitës që ishin të pranishëm, dy votuan kundër mbajtjes së seancës me dyer të mbyllura dhe njëri abstenoi. Gjëja e parë kur zbulohet një skandal është censurimi i medias dhe kjo gjë ndodhi dhe me seancën e këij komisioni, por përderisa të dhënat kanë dalë në pazar, interesi i vetëm është llogaridhënia e përgjegjësve para drejtësisë.